Халкъашта юкъерча къаман метта Денца даькъала бувц аз тахан берригаш!
Наьна мотт вайна бера хана денз хозаш бола, вай хьалхара дош оала, къаман адатий низ, дезалцара йовхале вайна хоайолийташ бола мотт ба! Цунца да вай истори, культур, вай цхьанкхетар.
Къаман мотт лорабарга хьежжа, воашош да вай лорадераш.
Галгайче дукха кхыдола къамаш дахаш мохк ба. Тайп-тайпара культур, дин леладеш бола нах ба укхаза ваши барт, бувзам, машар болаш бахараш. Вай лаьттан та хозаш мел бола хара мотт баьхий, лоархаме ба. Хара къаман мотт цун истори довзийташ йола ганз я.
Вай боккхача мехка дахаш долча тайп-тайпарча къамий метташ лорадара, цар хама эша ца далийтара техьа къахьегаш ба тахан паччахьалкхен оагонца.
Россе къамай метташ мехка культуран, кхоанен лоархаме дакъа долга белгалдеш къамаьл даьд Россе Президента Путин Владимира массехказа. Къаьстта теркалде лов, тов бетта 8-га ди вай мехка Россе къамай меттай Ди долаш дездеш хургдолга.
Наьна мотт лорабе, цун сий де дезилга кердадоакх вайна цу дено. Вай республике тахан цу оагонца дахьош бар боккха, лоархаме болх ба. Дешара программаш йоаржаеш, книжкаш, исбахьален литератур арахецаш, илман конференцеш, тайп-тайпара яхьаш, культуран оагонцара кхетачеш дакхухьаш къахьегаш ба тахан.
Йоккха терко лоаттаю ишколашка галгай мотт хьехаш болча белха, иштта хьехархой цу оагонцара говзал лакхъяра техьа, къаман меттаца болх дахьош болча хоамий моттигий болхлой, кхоллама тоабай оагув хьаллоацаш.
Галгай мотт, иштта вай мехка дахаш долча къамий метташ дезалашта юкъе, дешара моттигашка, юкъарлен, культуран оагонца хозаш хургдолаш дахо а болх лоаттабеш, цу гулакха эшаш мел дар алашдеш хургда тхо.
